給阿嬤的情書

純從電影角度看, 此作故事性强, 劇情編排出色。最成功嘅係演員, 外型夠哂草民, 演出亦到位。電影除溫情外，亦有點黑色幽默，亦對當年社會狀況有不俗嘅描繪，都係挖番啲陳年舊事出嚟話舊屎，細個已聽唔少。PS.• 印象中以前都好似睇過類似戲軋嘅故事作品 🤔• 客觀嚟講，套戲拍得唔差，但我又冇覺得好感動，因為呢類故事題材，漂洋過海劇情，喺好多電影/電視劇都睇過哂。事實我睇果場都冇聽到人索鼻。• 入場見到好多都係長者

劇情流暢感人，喜出望外之作！

故事性、鏡頭、剪接、節奏都掌握得極好，由其個故事，一路循序漸進咁鋪排，令成套戲幾乎無悶場，兩位女角好靚女、兩位阿嬤演出更好！導演完美駕馭到呢套作品。唔劇透下好難分享到個呢個故事後勁之強，只能話「阿嬤」嘅「情書」名符其實；亦將華人南下離鄉背井再落地生根——呢種中國嘅「南渡北歸」文化呈現得幾好，小弟睇完都大開眼界；見識到泰國同中國舊時之環境惡劣，無論對錯，前人種樹後人乘涼，古人生活比我地艱苦得多，呢點係事實。易地而處，理解到何解佢地「北歸」之心咁強！

中國咁大，一定有好嘅電影作品，呢套係呢幾年看到最感人嘅中國文藝電影。即使上畫了一段長時間，全院都9成滿座，後勁凌厲。電影滿滿濃厚潮汕本土情懷，感人之處其實放諸四海都適用。電影內容講流散，僑民在泰國漂泊的艱苦生活，也有遇上鄉里互相扶持，卻因一個意外令鄉間妻子誤會幾十年，直至孫兒到了泰國才找出真相。電影淡淡道來，由1940年代寫到現代，沒有很戲劇性的橋段，在大時代背景下描繪了離散後夫妻堅定的愛，也因一個意外令女方產生了幾十年的失望與遺憾，直至孫兒到泰國找出真相。

中國製造，昇級轉型，一帶一路，財大氣粗，孔子學院，戰機炮艇，文攻武嚇，都冇令人更接受中國人，到頭來，竟然係一套婆仔戲打開缺口。日本韓國一早知道軟實力重要，Anime, Manga, Jpop, Kpop 都令人想更了解日韓，中國就點做都被定為外人，甚至被妖魔化，最後天真到比錢喺 Timesquare 賣廣告。問題係中國政府冇嘗試搵共通語言，只用自己角度睇。家庭，愛，思念，哩啲能夠成為人嘅最大公約數。由而家開始，打開心，講人話，面對自己嘅過失缺點，可能更容易同人溝通，更容易令人接受你嘅不同。令人感動嘅係一份對同一個人嘅思念，縱使大家有利益衝突，甚至乎係敵對，都可以放下成見而互相扶持，哩個軟銷主旋律，難怪被人懷疑哩齣戲係統戰宣傳片，就算係真，都改變唔倒哩套戲真係好睇嘅事實！