火遮眼

4.2⭐以爽度同官能刺激度嚟講係高質。五位男角五種打法，打埋一齊並無突兀感覺，動作場面設計出色，有啲場口好有九龍城寨 feel，又或者可以話好有谷垣健治 feel。最特別應該係下半場五人大亂鬥，五個角色，三幫人馬，互相廝殺，差不多身邊有人就要打，亦具張力。而電影整體流暢，攝影、剪接、CG 都具國際水平，但略嫌故事較薄弱同劇情較典型，角色描寫表面，冇乜戲味。如果戲味濃番啲，相信觀眾情感投入度會更高，而家離開戲院感覺只係睇咗一堆精彩嘅 fight scenes。整體係一套有誠意，完成度高嘅娛樂爽片，值得入場！👍PS.• 呢套唔係功夫片，屬視覺系超現實格鬥動作片😅, 好多招式同場面都只係着重華麗但唔 make sense• 電影宣傳港產動作片，但片中冇一個香港演員角色(唔計朱咪咪)，冇一句廣東話對白，實在有點可惜，亦大大減低港產片味道• 彩蛋表示，呢集收得嘅話，係可以有第二集• 九龍城寨就係一套文武兼備嘅作品，有動作，有故事之餘，每個角色同人物關係都有較細膩描寫• 始終戲劇同人物先係一套電影嘅靈魂• 如果真係有第二、三、....的話，除咗繼續一味打打打之外，就開始要建立世界觀, 要建立人物, 要有故事, 要交戲, 咁先可以長久。

呢套戲應該只論武打場面，真係打得好激，好血腥，萬分緊張，打得好有力度同勁度，睇得好爽，超正！相信會有續集，希望到時都係咁堅揪…期待！

睇打片無疑係不二之選，可改善既係主角唔需要被muted 都可以理順劇情更好

我認為《火遮眼》係一套0到100嘅電影，0嘅位係劇情，劇情基本上就係無劇情，求其寫小小人設、故事，所有劇情都係見慣見熟、左抄右抄，總之是但搵個理由等大家可以打架咁啦！我好似講到劇情一文不值咁，咁事實劇情的確係唔好睇。取而代之100嘅位係100%嘅打鬥，健治先生非常明白佢自己嘅風格，雖然武打片、武術我一竅不通，但我作為普通人，睇到一浪接一浪無停過嘅打鬥已經滿足了，大家入場前收起對於故事嘅合理性，100%專注打交吧！雖然武術我真係識條鐵，但作為都鍾意睇甄子丹《殺破狼》《導火線》《一個人的武林》嘅觀眾，都睇得出谷垣健治已經擺脫甄家班嘅影子，有自成一格嘅風格。言簡意賅，打鬥非常極度好睇，三股勢力混戰都好有新鮮感，可以話係近十年最好睇嘅武打片，好幾下打到爆血、斷手斷腳，加上音效都睇到我菊花一緊。唯一想講我自己廢，套戲又收得坐得比較前，其實好多下都睇唔清楚做緊咩，有機會想二刷坐後啲睇清楚，第日上左串流後甚至想0.5倍速回味！

火遮眼 #TheFurious大家好，我是 Wild Wildy！今日想同大家深度拆解一下啱啱上映、全城熱話嘅動作電影——《火遮眼》(The Furious)。呢部戲由著名動作指導轉型導演嘅谷垣健治 (Kenji Tanigaki) 執導（監制江志強）（佢之前幫《九龍城寨之圍城 Twilight of the Warriors: Walled In》、《導火綫 Flash Point》、《殺破狼 SPL》做動作指導，大家絕對唔會陌生）。幕前陣容更加係神級 Pan-Asian 組合：由「李連杰接班人」謝苗 (Xie Miao) 領銜主演，拍檔《全面突襲 The Raid》嘅印尼硬漢喬·塔斯利姆 (Joe Taslim)，仲有內地天才童星楊恩又 (Yang Enyou)、「泰國拳霸女」琴嘉 (Jeeja Yanin) 以及印尼武術大師雅彥·魯伊安 (Yayan Ruhian)。網絡上目前 IMDb 衝到 7.7 分，Rotten Tomatoes 爛番茄更加係誇張嘅 99% 專業好評同 97% 觀眾爆谷度！如果純粹講武打編排，我直情會畀 9-10 分滿分；不過故事劇本方面，就大約係 6-7 分。對我黎講，呢部戲簡直就係「武打版嘅《救參96小時 Taken》」，再加埋《Hustle》同國漫《鏢人 Blades of the Guardians》嘅混血極限暴力美學！卜極致瘋狂、打出新高度嘅視覺盛宴：港式武打動作嘅極致揉合： 導演谷垣健治將最純正嘅港式硬派格鬥 DNA 注入左呢部戲入面，高密度嘅動作場面連場爆發，真係由頭打到尾，拳拳到肉！「武打人形蜈蚣」嘅新效果： 戲入面嘅新武術效果好似精密編舞一樣，好多幕人疊人、互相借力扭打嘅設計，我稱之為「武打人形蜈蚣」！特別係劇末終戰嗰場五人混戰大扭鬥，編排異常複雜，無論係空間調度定格鬥概念，喺視覺上絕對係開創先河。謝苗嘅極限體能展現： 謝苗喺戲入面真係T-1000「堅喪跑」，不斷跑、不斷打，完全無冷場。不得不感嘆，做武打明星真係搵命搏，極度辛苦但非常有誠意。出神入化嘅鐵鎚神技： 戲中對工具鐵鎚（Hammer）嘅運用直情係一絕，將一件普通工具變成奪命殺器，設計得極具創意又充滿暴虐感。一流嘅廢棄獨立大廈場景： 劇組搵到嗰個廢棄大廈場景調度完美，陰暗、壓迫，配合狹窄空間嘅困獸鬥，將武打張力推到頂點。淡淡嘅神級致敬位： * 冰廠大戰： 擺明係向李小龍嘅經典《唐山大兄》致敬，港片迷一睇實會心微笑。盲人追兇造型： 58 歲嘅印尼武術大師雅彥·魯伊安，一身衣著打扮完全係活生生致敬緊 1971 年李小龍客串嘅美劇《盲人追兇 Longstreet》，呢種骨灰級彩蛋真係誠意滿滿。再爽嘅打戲，都遮掩唔到嘅硬傷同老土位：香港電影嘅無奈現實： 雖然話係「畀香港人嘅情書」，但骨子裡反映左今日香港電影嘅困局——錢，香港出唔起（要靠外資同大班底）；地方，要借泰國嘅場地同團隊攝製；甚至連最耍家嘅動作設計，都要靠日本武指去繼承衣缽。呢種「香港魂、外地造」嘅感覺，睇完真係有少少唏噓。突兀嘅意識形態對白： 戲中主角個女楊恩又最後又要返大陸。其中阿爸謝苗（戲中飾演王偉）同大陸親戚嗰句對白：「呢度好安全」，真係突兀到令人當場出戲或想笑。唔通編劇想突顯其他地方就一定唔安全？定係想暗示拐帶兒童呢種罪行，淨係得國外先有？！老土兼肉麻嘅文戲設定： 戲中嘅對白有時真係幾老土。父親設定因為意外變成啞巴，但竟然可以「神速」學識複雜嘅手語，合理性有待商榷。而個女好多時候，會一輪嘴、大篇幅咁講出心聲，情感宣泄多得滯，顯得太過肉麻同埋有啲老土。無視物理嘅「鐵頭功」： 最令人想吐槽嘅係，戲入面被鐵鎚瘋狂重擊頭部竟然可以頂得住、唔死得？大佬，頭骨對鐵鎚，邊個會贏自己諗吓啦！雖然動作片要誇張，但呢度真係太過反物理。三級其實都不太三級。沒有傷口close up。斷頭也是朦朦朧朧。 Wild Wildy 總結： 《火遮眼》喺動作層面絕對係近幾年 Pan-Asian 動作片嘅巔峰代表作，衝住動作場面入場絕對值回票價！但如果你對文戲、劇本邏輯有要求，就可能要先做好心理準備，忍受一下入面嘅老土情節啦。不過神位冇打真係100分滿分。

呢類武打動作電影 故事劇本都唔太重要個故仔講得順暢就可以 不過連戲都係最基本野呢頭打到你血肉模糊 呢頭出返黎靚靚仔仔就令人有啲出戲 其實後期細心啲 避開個大頭或者補返個妝 已經連到BTW Kenji San真係好敢挑戰 勇於創新5個演員對招 係幾咁crazy 嘅事最後嗰場雖然有少少冗長 但不失精彩p.s.Brian Le個身型配合埋咁靈活嘅身手真係好有大哥大影子