揭密日

入場前 expect 係一套較認真、嚴肅、有啲深度嘅一套揭密外星人檔案、有一啲敏感議題要探討嘅電影, 點知睇完覺得都係一套普通娛樂電影。電影比我嘅科幻感覺都係好傳統刻板80年代荷里活嘅外星人科幻形象同構思, 外星人除咗科技比地球高之外，重有超能力。我期望嘅係史匹堡比到我一個全新嘅外星人同 UFO 概念。可能史匹堡嘅才華同思維仍然停留喺80年代嘅ET外星人層面。電影中雖有帶出宗教 vs 外星生命嘅議題, 可惜只係輕輕帶過, 並冇利用呢個議題造出劇力。電影中亦有提到要阻止公開檔案係為免世界大亂, 但又冇講如何會另到世界大亂。而事實係最近美國公開咗一啲外星人機密檔案，有令到世界大亂咩？似乎連公眾談論度都唔太高喎。基本上，雖然冇人真正見過, 其實絕大部分地球人類都已經相信宇宙之大有外星人存在並不出奇, 亦不一定智慧/科技比地球高。至於電影本身都算冇冷場, 但有啲劇情膠膠哋，而動作/飛車場面設計亦比較普通同牽強, 冇乜緊張感。而所謂反派組織又笨手笨腳, 一啲都唔兇狠, 可能又係唸住比一家大細一齊睇嘅闔家歡電影掛。整體係本人期望以下，但仍一看無妨。睇女主角都 ok 既～～PS.• 我睇嘅係 IMAX 版，但覺得此作冇需要比貴啲囉。• 見到電影中果啲外星人就令我唸起以前比 "今日睇真啲" 呃咗我成個禮拜 🤣🤣🤣• 我信有外星人，可能有高智慧，但唔信佢有太神化嘅超能力，如讀心術，預知未來能力，令人產生幻覺見到佢好似見到老婆/女兒...等等囉！• 都係果句, 唔會因為大師導演作品而影響我對其作品嘅真心評價

講真，拖得太長，中段有啲悶，同場（下午兩點半）有一班考試期間唔溫書嘅中學生走嚟走去，仲衰過啲廢老成日去廁所🚽可作為放蚊😴指標！人類同外星人接觸，多數人都同Stephen Hawking一樣悲觀，認為係自取滅亡⋯⋯George Lucas好少少，但都星球大戰，只不過成人童話化⋯⋯只有Stephen Spielberg永遠樂觀，第三類接觸開始，ET外星人至到本片都迷信外星人係善良和平嘅，即使有比地球先進科技，都甘願束手就擒，被邪惡嘅人類嚴刑拷打，供出外星科技，然後發展超級武器，發動戰爭，稱霸藍星！史匹堡可能係啱嘅，因為傳說上帝或諸神都係外星人，喺遠古開始好心將文明傳給人類，亦可能因為外星人善良有同理心鍾意分享，所以比自私自利鍾意鬥爭嘅人類進步快好多，唔係，如果佢哋惡毒嘅話，人類早就絕咗種！唔睇其他人，單睇猶太人，獨霸耶和華，只有舊約聖經，唔承認耶蘇，仲等緊救世主降臨幫佢哋打殘啲阿拉伯人，所以咪有內塔尼亞湖哩啲殺人狂囉。鍾意電影入面嘅修道院修女，上帝創造咁大嘅宇宙，冇理由淨係眷顧地球上嘅人類，換言之，神亦無處不在，同時恩澤不同星球嘅獨特智慧。我寧願信有善良嘅外星文明，多過偏心嘅神明！電影只有好人同壞人嘅衝突，刺激場面唔多，特技冇乜驚人之舉，外星人出場少之又少，口水多動作少，似文藝片多過科幻片，傳達信息於史匹堡而言屬老生常談，一而再再而三⋯⋯陳腔濫調。4星係俾Emily Blunt、Colin Firth(影帝做壞蛋都恰如其分）、Josh O’Connor, Eve Hewson & Elizabeth Marvel，佢哋演得好有感染力👍👍👍👍👍

預告剪得幾好睇，又講到套戲有幾好睇，原來只係雷聲大雨點小，會唔會吹太大？首先成套戲都係史提芬屎窟堡舊式老土拍攝手法、橋段同配樂，然後成套戲大部份時間根本都喺度追追逐逐，你追我趕，充斥大量根本可以殺死兩條友又唔殺嘅場景，悶足大半場，係得頭半個鐘同埋最後15分鐘係有啲嘢睇，但成套戲一路嘅鋪排都其實係靠個吹字，講到有幾懸疑，原來都唔係咁特別，就連捉男女主角個班組織都係求求奇奇，講到有幾神秘原來咁弱，捉兩條友又搞咁耐、又唔識得cut晒所有電視嘅直播，美國衛星都追蹤到啲人走咗去邊啦，捉兩條友搞咁耐？最後就係睇完套戲根本就感覺係大型預告片，講緊係對現實潛在世界各國政府可能隱藏咗嘅資訊嘅一條大型電影預告，但講真睇完好似係冇得着，睇咗好似冇睇咁，史提芬屎窟堡好似想探索外星物種對人類同宗教所帶來嘅衝擊，但淨係又點到即止又唔敢講落去。成套戲根本都係靠追追逐逐玩伏匿匿所以先有145分鐘，如果導演係想幫人類做一個預告呢套戲可能成功，但作為電影，根本就唔好睇。電影最後15分鐘嗰啲所謂揭密片段，只要你係相信有外星人，睇呢套戲嘅人根本唔會覺得震撼，如果呢套嘢擺喺70-80年代播就可能有feel嘅，但如果喺2026年嘅今日搞一套咁樣嘅電影，插啲所謂秘密片段、再臨尾整隻存有刻板印象的ET外星人模樣一齊直播，根本唔會覺得套戲有幾震撼。最後就係套戲3分其實係比歌連費夫同Emily Blunt，尤其後者憑呢套戲絕對可以爭奪影后。不過，我着緊嘅係電影入邊嘅外星人片段，會唔會有機會係真嘅呢？會唔會係美國政府俾呢位超級大導演播呢？最後奉勸大家唔好嘥錢睇IMAX，根本冇必要，只係一套80年feel嘅劇情科幻片。

冇頭冇尾，完全九唔搭八，串流平台Netflix有得睇都嘥我時間，根本睇電影最後嗰5分鐘，你一入場就已經知道個結局幾荒謬滑稽，低成本製作，總結嘥時間嘥金錢或稽完全九唔搭八20分

外星人一直都存在，我們有權知道真相。唔明點解呢套戲啲人比咁低分，值得滿分。