F1 電影

4.3⭐本作絕對係一套出色嘅商業娛樂片，值得入場娛樂一下。如我所料，本片屬大路賽車運動熟血勵志故事，但勝在處理出色，細節豐富，文戲同賽車戲份取得平衡，節奏得宜，仍能說好一個打動到觀眾嘅故事。演員當然亦表現到位，尤其畢佬，成熟不覊外型做過氣賽車手，非常有型，亦令人信服同投入。本片另一賣點，亦係其精彩之處，當然係緊張賽車場面。其超近距離拍攝同嶄新嘅視點切換都領觀眾妨如落場嘅車手，加上出色嘅CG特技同剪接，我認為本片嘅賽車場面係現時賽車片嘅天花板。以 IMAX 嘅視聽質素，真係冇得輸，兩個幾鐘好快就過。睇呢套戲時不期然令我唸起 Top Gun 2，因為覺得有好多共通之處 : (含劇透)1. 人物設定/關係• 畢佬 = 湯佬...都係中佬，經驗同技術高超、玩命、有污名/黑歷史、不逐名利、只求自我滿足、自以為風流浪子，又係突然比熟人挖番出嚟身負重任，完成任務後又選擇繼續行自己嘅路• 女F1工程師 = 女酒吧老闆...都係中女，扮哂cool，其實等仔溝，同主角有像霧像雨又像花嘅感情線• 黑人新進車手 = 戰機學院學員...都係自以為好醒，寸寸貢，同主角衝突，其後明白自己好渺小，最後friend返並且敬重主角• 車隊領隊 = 戰機學院湯佬上司...都係要主角quit，但主角話之你，最後任務完成後，笑住擁抱主角2. 電影嘅劇情走向同起承轉合近似3. 逼真嘅賽車畫面 vs 逼真嘅空戰畫面...都係經常影住主角戴頭盔正面大頭同繃緊嘅眼神以上都令我覺得兩套戲其實好相似，不過一個講天，一個講地。本作導演其實正正就係Top Gun 2 嘅導演，源用返上次成功嘅同一條方程式，慳水慳力，欠缺咗啲創意同誠意，要扣返啲分。整體嚟講，本片屬大路商業娛樂片，但處理同製作出色，觀眾睇得緊張，極盡視聽之娛，絕對值得入場，even 比貴啲睇 IMAX。PS.• 冇彩蛋• 除咗湯佬，畢佬都可以獨挑大樑，擔起一套戲• 本人睇嘅係 IMAX 版，推薦！👍• 有二刷 MX4D 價值• 鍾意玩賽車game 人士絕對要入場• 30/6 二刷 Screen X 版，總之絕大部份賽車場裏嘅畫面(包括文戲)都有Screen X effect，感覺也不錯，但首推仍然係 IMAX 版。• 8/7 三刷MX4D版。本人覺得比IMAX版更正！👍因為所有4D效果比平時一般動作片嚟得合理，唔會39唔搭8，完全配合到當時劇情同賽車畫面，令投入度提高，爽過IMAX版，尤其最終果場賽事，起跑、抽頭，最後畢佬敖翔天際，真係好正，建議冇睇過MX4D版觀眾入場再體驗，我三刷MX4D版依然投入熱血。我影評標題已由IMAX 改為 MX4D。😅

緊張刺激，鏡頭運用到恰到好處，Brad Pitt 魅力四射,是片中靈魂，如果冇咗佢成套戲都會失色！

1) 61歲Brad Pitt靚佬型全場，有頭髮有身型真好2)有晒真實F1車手、領隊客串，十分有真實感；但有追開F1睇到又會出戲，因為有種明星點抽贏7屆、4屆世界冠軍3) 多角度展現賽車爬頭、炒車、自炒、非技術策略4) 配樂幾好，有Top Gun 張力5) Brad Pitt同女主角感情線有説服力，難得6) 男二欠少少吸引力，差少少共鳴7) 在K11睇IMAX版，有冇人知iSquare個螢幕係咪會闊啲P.S. 入場我同步在手機睇F1奧地利正賽Live，有feel正！威廉士車隊Carlos Sainz熱身圈真係撻唔到架車、紅牛Max Verstappen被Mercedez 新人Kimi意外撞到雙雙出局dnf (did not finish)…好真實！科普下無跟開F1的朋友-如果賽車賽事中有碰撞，常見會引發黄旗(細型碰撞) 大會會駛出安全車去帶頭，所有車必須減慢車速，令所有車車距瞬間收窄，通常賽車會趁機入維修站pit 去換呔慳返時間，但決定唔入就會overtake 爬咗頭；紅旗(大型意外)所有車會入維修站等賽道清理完畢，再等重新開始，呢個時候又是換呔好時間-但蓄意碰撞或危險碰撞，賽會會即時調查可以即場罰秒數，亦有機會在車手的F1駕照罰分，罰滿分就要停賽-每次換呔靜止秒數快則2秒多，慢則3秒多-紅呔Soft 圈速最快但不襟用，其次黄呔、白呔Hard-每架賽車由賽會提供一樣的車呔種類及一樣數量-落大雨會跣呔，一般會入pit換雨呔，但高手如韋斯塔本，有時會頂一陣不換，博下停雨，或等其他人炒車先用黄旗紅旗時間換，但炒車風險高

雖然劇情一般，但拍攝認真，娛樂性豐富。近期佳作，絕對值得一看！

我不懂F1的喜歡上F1

雖然不太喜歡看公式化的電影，但係這套真係好好睇，賽車場面，音樂，節奏明快，情節令人歡悅，Brad Pitt 仍然咁charming, 享受這兩個多小時, 電影的魅力！