功夫夢：傳奇少年

個人覺得套戲整體是可以，我會形容套戲比上不足，但比下卻有餘，是合格水平。他雖然有龍威小子應有的元素，但在細緻描寫上卻有所欠缺的。講真，套戲中故事角色鋪排雖然有心，但執行上卻過短、快同少許不足份量，無疑好令套戲進退失據。武打場面，個人覺得今集整體是不俗，最少無揸流灘，真是實實在在去打。導演在今集中，好刻意去回歸好有九十年代味道生活化式訓練場面，的確是一大取分位，而最後對決這個復刻，也是比預期中好。如果純粹講情懷元素，個人覺得這套是合格。咁當然，套戲中今次有些幽默位的處理，的確有點誠意。痴·影·夢·藝 X 的專頁 https://www.facebook.com/ckwunmovie/

重來都冇睇過一套無論故事同人物一啲深度都冇嘅電影。導演似乎只想拍一套流水式簡單劇情嘅電影。全片劇情老土公式，直線咁去，冇高低起伏，亦冇任何深入想描寫嘅嘢，更加冇講故事技巧可言，人物/劇情轉折位話轉就轉，角色話出場就出場，毫無舖排，好突兀，係一套故事同人物都冇靈魂嘅電影，睇完係冇嘢會留喺個腦度嘅。此作唔值得入院，就算串流都有好多其他選擇。PS.• 男主角 Li 嘅選角屬趕客之選。• 感覺似睇緊日本TV動畫總集篇咁，好多details都剪走哂咁。

如題，劇情鋪排簡單而順暢，成就一位移居外國少年的功夫夢，最後的決鬥也十分精彩，令人血脈沸騰！是令人睇得相當舒暢嘅電影。4.7/5 （93分）

我好鍾意1984年嗰套Karate Kid，之後第二第三集每況越下，後來2010年成龍同Will Smith個仔合演嗰套簡直慘不忍睹！今集喺trailer見到成龍已經唔想睇，但可以見返40年前嘅老友Daniel、Johnny同Miyagi（死咗好耐，靠AI復活），於是今朝睇咗老人早場，故事單薄，差唔多老翻40年前第一集嘅情節，只係改少少，同將角色調換而已。成龍訓練李方，老翻袁小田當年喺蛇形刁手或醉拳訓練自己嘅畫面，冇乜新意！至於「新龍威小子」Karate Kid：Ben Wang又唔靚仔又唔有型又唔見好身手，當年Ralph Macchio比佢可愛唔知幾多，最後五區空手道比賽明顯抄襲1984年嘅比賽場面，但完全冇當年熱血沸騰、激蕩人心嘅效果，打得好hea求其打完收工嗰隻！唯一特別啲嘅係成龍演嘅韓師父用中國功夫、Ralph飾演嘅LaRusso用沖繩剛柔流空手道，一齊訓練李方去打擂台，強調中國功夫同日本空手道同出一源，係「一樹兩枝」！其他嗰啲父女情、母子情、師徒情、老少練拳、少男少女初戀、懷舊情⋯⋯都流於表面，甚至肉麻當有趣，無無聊聊，充撐場面塞時間，睇到好老尷，完全冇感人位！諗返當年睇Miyagi訓練Daniel嘅點點滴滴，如今只剩空虛同唏噓，此情可待成追憶 只是當時已惘然！

唔會睇；唔會浪費人生寶貴的兩、三個小時