衰鬼媽咪2

3.8⭐玩對調身份唔係新橋，但導演/編劇玩得幾好，人物身份/角色對立對調得宜，玩出環環相扣嘅角色衝突笑料同劇情，笑料嚟得自然，唔會睇得好老鑑，亦令最後大團圓結局來得合理自然，觀眾暖暖開心離場。本片所有演員都演得幾好，尤其婆婆同媽媽。色演阿女嘅Julia又好靚女。😍本片係可以入場一看嘅暖心輕鬆温馨小品。PS.• 色演婆婆嘅好戲演員令我唸起DoDo姐，兩個style好相似。• 四個角色身體互調，邊個打邊個我有時都覺得有啲辛苦去 follow。純粹本人問題。😅

無睇過前作，覺得個個設定好正，全程相當輕鬆好笑，年輕人唔想變老，成年人亦適應唔返學生生活，而到後面就係破鏡重圓嘅時候，場面溫馨感人。4.7/5 (93分)

第一集係婆媽掉轉靈魂，今集再大龍鳳一啲，祖媽孫女三代四人互調，最後四人代入對方角度或以原本自己以外嘅角度，旁觀對方、自己、外間、世界⋯⋯終於消除偏見，化解誤會，一家大團圓結局，個脈絡好大路（即是老土），但都撞出唔少老中青之間代溝嘅火花，亦相當寫實並發人深省！電影屬於輕喜劇，都有唔少會心微笑嘅時候，不過最好笑係片尾嘅蝦碌鏡頭，唔趕時間，就不如等戲院燈光亮起至走啦！

前作就因為食了幸運曲奇加地震而一夜間交換身體，因而真的「換位」思考而諒解對方。今次就由二個對調，變成四個女主角互換。算有笑料但反而劇情不夠扎實。最好應該是外婆變回小鮮肉，暫時不用處理假牙尿布黑人老師神助攻，幫手餐廳預約。原本的女主角就因為阿女學校出事而識了男主角，繼以一見鐘情，並連同這個單親爸爸與準繼女組成新家庭。一車人就要搬去倫敦，因為新爸爸的工作，從而移民𧗠出像前作的家庭矛盾。不免與前作有所相似，好似餐廳爭執期間，又有神婆在特別時機來占卜。上學留堂、婚禮彩排各有不同性格，去到阿媽為了女主角而放棄經記人身份，再結局一齊上台和解。

印象中好似冇睇過第一集，但事隔多年見到Lindsay Lohan有電影當然都要睇吓，亦都估唔到套戲咁多年都會出續集！當年淨係交換兩母女，而如今兩個都年紀大咗好多，所以再搵兩個後生女加入做新元素係可行同埋合理的！而四個人嘅交換靈魂同身體今次可以話係好有化學作用，四位女士演出好有火花、做得好好，兩位後生女演出好正！而電影劇情可以話係幾大路同合家歡，始終係迪士尼作品，睇完係令人窩心同感覺溫暖嘅，雖然劇情上俾人感覺比較小朋友向，而且結尾收得有啲急，但整體都唔錯，雖然講唔出咩大道理，但呢種親情片都係令人好親切！喺套入邊見到導演嘗試營造唔少幽默搞笑位，但講真真係唔係咁好笑，未至於令人尷尬，但大部份時間只係會心微笑。趕喺開學前上映，呢套都幾適合一家大細睇嘅，入場一睇無妨。

蓮茜露漢與珍美李寇蒂斯，睽違廿多年再續母女緣的《衰鬼媽咪2》，不乏一些引人發笑場口。只不過在DEI政治正確的陰霾籠罩下，一齣迪士尼青少年電影，不單離不開略嫌老派的主旋律，還硬要加上白人女子與亞裔男子一見鍾情，再配合黑人女教師從旁神助攻的情節，真是名副其實的「面面俱到」。青春叛逆期是一段自我認同，以及面對挫折和成長的重要過程。竭力擺脫翼蔭，急切掌控自己人生的心情，過來人想必清楚。假如真的可以透過「交換靈魂、換位思考」，未嘗不是一條簡便快速的捷徑。03年《衰鬼媽咪》上映時，類似的靈魂對調橋段算得上是比較新鮮，遠未去到泛濫成災，不斷被炒冷飯的地步。只是時至今日，再聽到舊主題曲“Take me away” 的幾句歌詞「Same old story, the same old end.……Same old stuff, never ends」，不禁讚嘆此先見之明的超級自嘲。蓮茜露漢在98年《親親兩顆心》 分飾雙生姊妹花，紅髮雀斑配上靈動眼眸，瞬間成為世紀末的另一位莎莉譚寶。五年後，小可愛在《衰鬼媽咪》已出落得亭亭玉立。而《衰鬼媽咪2》扮演蓮茜女兒的Julia Butters，同樣是童星出身，19年在《從前有個荷里活》與狄卡比奧演對手戲，已初具大將台型。希望這位二八年華的可人兒，可以順其自然地好好成長，不要步蓮茜後塵，被醫美弄得面目全非。歷年感想，存檔IG及FB：pm7290movie（https://www.facebook.com/Pm7290movie-105185654399988/）歡迎瀏覽。