我的鄰居是惡魔

2.8⭐113分鐘嘅戲，只有最後20分鐘有少少激情，之前果93分鐘都係冷場，乏善足陳，了無新意，唔好笑，唔浪漫，唔緊張，唔有趣，冇氣氛，重要拉長嚟拍。另外所謂"悪魔"其實似悪女多啲，冇法力，冇殺人，更加冇做壞事嘅念頭/計劃，化個 wild 啲嘅粧，行為粗粗魯魯就叫惡魔上身，come on...除非你話比我聽呢個係悪魔新定義，買哂便利店啲蛋糕唔比其他客人買就叫做做壞事好邪惡？說穿了其實又係另一種我的野蠻女友配戆男~~。既然係咁嘅設定，點解要喺戲名度叫悪魔？令觀眾有錯誤期望。角色塑造亦都典型。男主角表情生硬，角色變化係冇。只有女主較為亮眼同養眼，角色變化較大，較有機會發揮，表現較好，但仍欠一點火喉。老豆同細妹角色以配角嚟講亦冇乜突出，睇完套戲好似冇出過場咁，對個戲係冇乜影響。一直監視女主角個男仔直頭可有可無，外型又三尖八角，成個李燦琛咁，好唔順眼。整體成套戲平平無奇，似電視劇劇本同製作水平，有廉價感覺，唯一嘅亮點係睇女......主角潤娥，如果唔係特別鍾意睇佢，呢套戲可以不看。PS.• 韓片最大賣點永遠只有女....演員。• 入場後覺得貨不對辦，有氣球嘉年華冇氣球嘅感覺。• 今年睇過嘅韓片都好唔掂• 排片場次咁少唔係冇原因

前半段都係標準韓式笑片劇情，但同惡魔版本女主角相處後大概就知佢背後有故事。果然後面感動位極強。同正牌女主角嘅感情線篇幅較少但都唔錯。4.7/5 (93分)

我有啲羨慕吉久，愛上一位擁有兩個靈魂嘅美女，有啲似至尊寶，日間愛紫霞，夜晚邂逅青霞，等於有兩個女朋友，一個溫柔一個刁蠻，齊人之福？疲於奔命？當局者迷啦！電影片名有誤導之嫌，附身善智嘅根本唔係惡魔，只係一個憤怒嘅怨靈而已，否則，吉久都唔會由憐生愛日久生情！更幸運嘅係日間嘅善智一覺醒來，對夜生活完全失憶，唔會計較吉久晚晚陪文陽賞月⋯⋯只是最後善智終於鼓起勇氣，主動追求吉久，吉久之後點向善智解釋為何要喺自家供奉文陽嘅骨灰甕⚱️50年呢？其實我唔係特別鍾意K-pop、韓流，所以本來對Girls’ Generation都冇乜感覺，直至2019年睇咗《極限逃生》至對林潤娥驚為天人，活潑、勇敢、善良、聰明、溫柔、堅強、有活力⋯⋯靚成咁仲要真係識演戲，以後佢嘅電影🍿電視劇都捧場，所以哩套都唔例外，一人人格分裂，日夜兩種性格都拿捏得恰到好處，冇太誇張過火，仍然俾人自然舒服嘅感覺。難得今次男主角外型演技都匹配，安普賢係升級版嘅金秀賢，大隻啲Man啲靚仔啲人品好啲（至少未迫死前女友😱😱😱）電影有笑位但唔算爆笑，有煽情但屬溫情感人嗰隻，唔算夾硬嚟，浪漫都有，但男女主角只係拖下手仔、攬過一次咁多、錫錫完全冇⋯⋯差啲以為睇緊寶萊塢（印度🇮🇳）愛情歌舞片（眼看手勿動）😱但咁都俾你有浪漫嘅感覺，不能不佩服韓國編劇和導演嘅功力！

發現鄰居日頭跟夜晚是截然不同的人，而自己就是一個工作上不如意的青年。初次「碰頭」就直搞跟一見鐘情女主角的爸爸與表妹助攻搞出大頭佛！夾公仔機都可似俘獲惡魔的心，暖男必學之技能。這個導演偏向發掘人性之善，所以整體都是好舒暢。伏筆亦逐漸挖出，結尾確實淚人。剪輯時機好有效，草食對白令惡魔無可耐何。體育生的夢中小狗設定，再相對惡魔愛花的伏筆亦有相應發揮。導演前作《極限逃生》一樣輕鬆觀看無壓力，未來50年都有好戲看。男主角選角適合，呆呆卻又無害的貼心舉動活現出來。夜晚跟被接管的惡魔互動好搞笑，一邊要想辦法跟對方談戀愛，一邊又要諗方法令目標報上名字。漢江渡河一段更加是地獄級爆笑，呼喊出靈魂的爆笑。甜美情人，一到夜晚就變心計大媽算是有趣！然後神秘男人出現又增加伏筆。惡魔「夜常」去玩路人，雖然都是凌晨兩點例行公事又晚晚有驚／喜，心心手勢變要打格仔的級數，逐漸升級打破能承受的淚點善終到結尾。沒有尷尬的特效，反而是粗實繩韁令人「卻步」留座！還有見到當地CGV跟香港一樣的裝修幾奇妙。尤其中段女主角發火掟爛瓦缸之後更加着感，令人更想知這個只要三小時活動的惡魔源由。整體算是過得去的浪漫喜劇。

林潤娥身為韓國電視劇其中一位收視保證，「潤娥效應」的號召力，卻遲遲未能為她贏得一個既叫好又叫座的電影劇本。相比起笑料滿滿，現正熱播的電視劇《暴君的廚師》，這齣《我的鄰居是惡魔》，明顯沒有讓潤娥十足發揮她的演技和搞笑本事。李相槿導演與潤娥，早於2019年《EXIT：極限逃生》已經合作。潤娥在該片的表現，儘管遠勝《秘密任務》1、2的花癡角色，但整體仍稱不上特別出眾。此番再度合作，李相槿導演為潤娥量身編寫的角色，是一個白天端莊大方，凌晨兩點以後變身惡魔的雙面「人」。這樣的設定，無疑是希望「潤娥效應」的威力，能夠在大銀幕上盡情釋放。事實上，潤娥亦不負所托，在溫馨與搞笑之間切換自如。不過，一齣電影的成功與否，還需要有很多其他配合。《我的鄰居是惡魔》未盡人意的地方，是愛情浪漫的甜度及天馬行空的奇想，兩個部分都過於拘謹，像飲下不冷不熱的溫吞水，未能暢懷。最後說點題外話，過去眼仔碌碌的綠葉演員成東鎰，不知何故變了耷拉眼，希望只是年齡增長的現象，而不是身體有其他毛病。歷年感想，存檔IG及FB：pm7290movie（https://www.facebook.com/Pm7290movie-105185654399988/）歡迎瀏覽。

韓國近年嘅電影實在了不起，整套戲基本功非常紮實，我相信韓國電影已經整左一條完整嘅拍攝方程式，經過老導演傳承、薪火相傳得好完善。就好似《惡魔》咁，整體無咩大嘅反轉位，最後開估嘅惡魔身份、驅魔人個part我覺得都唔算玩到最大。但受惠於紮實基本功（剪接、燈光、鏡頭等等全部無伏，但你話超級好又未到）、流暢嘅說故事手法、足夠嘅人物感情培養、加埋俊男美女，造就一套不俗嘅電影。《惡魔》有煽情有感動有純愛，睇個時係覺得幾愉快，但你話睇完係咪好有印象又唔會，相信一年後劇情大致都會忘記得七七八八，呢點亦係流水線公式化製作嘅壞處。當然，就係要有無數類似《惡魔》咁普通得黎又不俗嘅電影大量堆砌，先會形成到類似《上流寄生族》《逆權司機》等等揚威海外嘅經典。於我睇黎韓國電影業其實非常健康，遲早又會出到震撼人心嘅電影。