九龍大眾浪漫

3.2⭐漫畫版本人睇咗少少，動畫版13集睇哂，今日再睇埋真人電影版。漫畫版同動畫版篇幅較長，人物、場景、劇情同支線較多，描寫亦較細膩，而電影版由於時間所限，只 focus 喺男女主角之間果條愛情主線。亦因為咁，有啲喺動/漫畫版裏面有重要故事線嘅人物喺電影版裡面 cut 咗，有啲就背景描寫/出場唔多，有啲什至變得可有可無。所以如果冇睇過動/漫畫版就入場睇電影版嘅觀眾會覺得有啲場面好突兀，有啲角色出場唔知做乜，又或者有啲劇情不明所以。故事方面，原作者本身處理故事同人物方面都唔算好出色。故事雖然係講愛情，但一啲都唔浪漫、唔感人，反而我覺得係奇幻。而電影版由於要盡量忠於原著，所以男女主角條愛情線都係只有奇幻而唔係浪漫。演員方面，女主角選角可以接受，戴著眼鏡都有原作/動畫版8成相近，但晨早起身性感衣著就欠奉。男主角選角較遜，唔出聲還好，一出聲/演戲就出事，唔太討好。期他配角選角都係麻麻哋。場景方面，三個版本都一樣，除咗一啲城寨遠景係較真實之外，城寨內部嘅場景都唔係取材自真實嘅城寨，電影版更取景於台灣。不過考慮到今時今日嘅香港，折得嘅都折，重邊有合適場景比人拍呀~~！理解。整體呢套電影版係一套奇幻愛情故事多過係一套好浪漫嘅愛情故事。而故事構思有啲唔係好make sense 同有點難以理解。 不過大致上還原到原作漫畫/動畫版嘅氛圍。PS.• 其實動畫版我都覺得好多地方難以理解同不明所以• 日本人對浪漫嘅定義可能同香港人有啲唔同• 黑底字幕後仍有幾分鐘唔知算係劇情定彩蛋嘅內容，唔趕時間睇埋先走

劇情唔難估。不過睇女嚟講，呢套戲就滿分嘅。基本上係可以睇足兩個鐘頭吉岡里帆，當然梅澤美波都係正。

個人覺得套戲整體不俗。我會形容，套片好充滿日系浪漫感，無論是構圖、攝影、調色、調光，好有這樣的感覺，而城寨的背景也是令整件事好匹配。咁當然套戲中，好有舊香港文化的元素。盡管是好不真實。而無疑，今套的確是漫畫同動畫版之濃縮版，所以好多位卻有所縮寫，但大致可以保留到精髓。咁當然，我會諒解這套因為無合用場景，所以無奈地用台灣實境來拍，模仿故事設計中城寨的感覺，但個人依然會覺得套戲中沒廣東話元素有點不味兒。PS：如果是眼鏡或旗袍娘控，睇這套，一定會睇得極為滿足。而導演也好識做，用好多日系濾鏡特寫鏡來討好這類觀眾。如果純睇吉岡里帆，真是會睇到😍😍😍痴·影·夢·藝 X 的專頁 https://www.facebook.com/ckwunmovie/

唔知睇左D乜，導演活在自己天馬行空的世界，但肯定是日本人頗喜歡中國。故事背景是九龍城寨，場景一看便知是以外國人的視覺看中國。中國電影牽動仇日情緒高漲，但日本人能夠拍一套尊重中國人生活風俗習慣的電影，世界和平是老百姓所要。

無睇過原作入場，前面偏慢，但懸掛喺天上嘅"地球子星"又好奇怪。。。整體節奏都係偏慢，不過中段核心設定逐漸浮現，故事開始變得相當有趣。都後面已經代入到女主角，衷心希望女主角可以成功。。。！！4.6/5(91分)

當然九龍也不是真九龍，工藤發失去玲子後，大量回憶注入「地球副星」（雲端記憶體），衍生出「第二九龍城寨」（模擬實景），和鯨井玲子2再邂逅，若即若離，拖延戀愛開始、分手嘅重來，但玲子2越來越有「個性」，除咗外表，越來越唔似玲子原型，終於愛上新玲放下舊玲，走出去，離開記憶、失戀、冒牌貨九龍城寨，重新上路、重新開始、重新去愛！話佢九龍唔九龍，因為佢其實講嘅係消失咗嘅九龍城寨，但九龍城寨都唔係九龍城寨，太光鮮、太寬闊、太乾淨、太「整齊」、洋溢住溫暖嘅人情味，而唔係烏煙瘴氣。仲有成個城寨啲人講日文為主，間中夾雜一兩句普通話，就偏偏一句廣東話同粗口都冇，咁點算城寨呀？話佢大眾唔大眾，因為堅持happy ending結尾，符合大眾期望，但係導演想表達啲乜，大眾未必get到喎！話浪漫唔浪漫，場景、故事設定都唔現實，加上俊男美女喺虛幻國度邂逅，都係浪漫元素，可惜鯨井1走得牽強，工藤發又婆婆媽媽，如果唔係吉岡里帆樣子可愛（我覺得佢有機會成為第二個新垣結衣），演活勇敢去愛嘅鯨井2，可能連啲啲浪漫都冇！日本人好迷戀九龍城寨，居然喺電影🍿入面重複咗幾次「閃爍嘅燈光，發霉嘅小巷，擦身而過行人身上嘅臭汗」好令人懷念😱😱😱佢哋好鍾意懷舊，懷日本自己嘅同埋人哋嘅舊事舊物，「人年紀越大，越鍾意亦越多嘢去懷念」，「戀愛和過去都好值得懷念」，傷逝、思舊只令人如工藤裹足不前，所以導演用鯨井2冒住會魂飛魄散嘅險，去鼓勵觀眾不要原地打轉，走出去，向前行。不過啲打氣唔係好夠力，因為電影節奏慢，冇乜高潮，而且都幾悶吓！利申：漫畫+動畫都冇睇過，冇同原著比較。