神奇4俠：英雄第一步

個人覺得今次整體是精彩我會形容，今套可能是MCU中最有溫度的一套，作為第六階段的序曲，他是開得精彩，雖然在故事敘事處理上，他們有點保守，但依然也是精彩。無疑今次導演的走向，是從感性同理性之間矛盾同整個組合作為故事主軸出發，而不是以往般，講出道，各自曬其能力，陷入小低潮之後所謂結合增強拼湊而打大佬格局。今次MCU的確有其心思去雕琢，個人對這樣是討好。其中我最喜歡開首這段的舖排。除此之外，描寫四個之間的佔比平衡度調控也是準。個人會覺得因為這樣，可以令之後更巨大的末日之戰埋下更紮實設定基礎。同時，雖然套戲有DEI元素的基因，但導演執行卻比之前純熟，不會純粹因想討好而為加而加。技藝方面，今套整體也沒令人失望，場景、美術、配樂等，也是符合預期，這副六十年代懷舊科技風的美術，好貼合原裝原裝漫畫的設定，這方面一眾F4舊粉會感驚喜，而配樂處理同樣咁精彩。而行星吞噬者登場的場面的確是震撼。在我而言，如果將F4同SM比較，個人會喜歡F4多於SM母性所衍生的力量真大……………………PS：作為 IMAX 粉，今次可以再睇到久違的專製IMAX 專屬倒數片頭，心情好感動。痴·影·夢·藝 X 的專頁 https://www.facebook.com/ckwunmovie/

入場前期望度唔太高，但都有少少嘅，所以失望度唔太大，但亦冇乜驚喜。前半部上太空揾敵人前嘅人物同背景鋪排做得唔錯，節奏明快，表達清晰。可惜下半部由太空落返地球之後劇情開始有啲膠同老套，節奏又慢咗落嚟，戰鬥場面玩得唔算精彩，冇好好發揮到4俠每個角色嘅異能去玩岀精彩嘅視覺效果同場面，同時亦睇唔到有好強烈嘅團體合作去對付敵人，各有各打，但又唔夠打，兩下就比銀魔或大佬打低，睇唔出佢哋好勁囉！不過所謂大Boss星球呑噬者亦唔見得好勁，得個大字，慢吞吞，冇招式，純粹以大隻壓人，咁遠專程嚟到地球發威都只係推冧幾座大厦就被推入陷阱收皮...哎！😣 絕招原來只係透視眼！🤣🤣🤣角色方面，4俠角色描寫主要喺兩公婆，其他兩件只係陪襯，可以講係大配角或工具人，需要用到佢哋異能先出現，整體4條友英雄感唔太強。反派方面描寫亦不足，只知到來歷不明嘅巨大boss想呑噬地球，人型銀魔背景故事描寫單薄，最後突然掉轉槍頭有點突兀，多啲鋪陳會好啲，係角色描寫不足所致。全片最想讚嘅係美術同服裝設計，做到古祖得嚟帶卡通科幻感。另外，睇 IMAX 版嘅話，大Boss出場嘅巨大感做得幾好，眼前一亮。整體上半ok，下半略為沉悶，睇完冇乜心情起伏咁離場，但相信一般觀眾還是會比錢入場吧！🤣PS• 有兩個彩蛋，要睇到字幕完哂• 睇IMAX要準時入場，因為 IMAX 影院專屬開場畫面都係因應F4 全新製作，唔好miss。• 其實呢4件喺戲中都幾廢吓，嚴格嚟講...如果唔係有銀魔反水，佢哋係打輸嘅，令我對佢哋喺Avenger 5 嘅領導角色成疑。• 呢套大Boss首次出場對眼一著燈即時令我唸起高達，再睇清楚原來帶咗眼罩同頭盔又令我唸起馬沙。🤣🤣🤣

《神奇4俠：英雄第一步》的漫畫感拉滿。大城市的建築風格、市民的衣著打扮、室內的裝潢設計，均契合漫畫的誕生年分——上世紀六十年代。這種帶有還原基本步意味的設定，配搭「復古未來主義」所產生的化學作用，使到電影在一個令觀眾期待值較高的氛圍下展開。處身於多元宇宙「828地球」的神奇4俠，是那個世界絕無僅有的超級英雄。然而，面對來自外太空的「殲滅者」，神奇4俠的實力有如小巫見大巫。號稱是宇宙神祇的「殲滅者」，要求神奇先生（貝哲羅柏斯卡飾）與隱形女俠（雲妮莎卻比飾）交出他們即將出生的長子，作為換取地球免於浩劫的條件。亞伯拉罕獻祭以撒的故事沒有重演。過程中，陷於「電車問題」困局的隱形女俠，憑着一場毫不感動人心的演說，化解了倫理道德的公關危機，相當缺乏說服力。不過，比起2015版《神奇4俠》的全方位不如人意，這一幕也就算不上太差勁了。吸收了十年前的慘痛教訓，新系列的漫威「第一家庭」，在復古懷舊外衣包裝下，整體的表現可評為中上。當然，若論顏值，新隱形女俠和霹靂火姊弟的扮演者雲妮莎卻比與祖瑟昆因，較之廿年前的謝茜嘉艾芭及基斯伊雲斯，明顯遜色不少。電影中可稱得上是有趣和吸引的角色，除了機械人賀比和超級嬰兒Franklin之外，全新面貌登場、戲分不多的Mole Man（Paul Walter Hauser飾）亦是另一個討喜人物。歷年感想，存檔IG及FB：pm7290movie（https://www.facebook.com/Pm7290movie-105185654399988/）歡迎瀏覽。

算有返水準，節奏和情節都合格，唯一係尾段打大佬有小小唔夠強勁，係近年合格以上嘅作品。

想像唔到Fantastic 4之後多一套蜘蛛俠4就已經係復5，Doctor Doom除左曇花一現外仍未見蹤影，到底Marvel有無能力再上高峰？就咁睇Fantastic 4算合格水準，開頭一小時幾乎都未有打鬥動作場面入局較慢，重點描寫4人關係算中規中矩，未覺4人關係有幾家人Feel，中間加插「Marvel式互串」都見慣見熟，不過整體都無咩大伏。但你話要用承上哨兵啟下復5水準黎睇，真係有小小失望。武戲打鬥部分呢4條友都唔係勁，但正如美隊係復4都唔係靠武力。但呢個神奇先生真係全世界最聰明嘅人？聰唔聰明就唔知，但肯定係最正直嘅人，小小大話都唔會講…...不過都描寫到如果世界交比一班最聰明、負責嘅人領導，理想嘅烏托邦係點。如果係現實世界，起個幾舊傳送點起馬貪返十億八億先啦，仲可能會有人奸出賣地球。Galactus吹到係威係勢，仲話會吞噬行星，但除左掃冚幾棟高樓大廈外完全唔覺有咩實力；銀魔人設都無乜描寫，幾句說話就……唔劇透，但說服唔到我。《神奇4俠》我覺得算有新突破，動作特技偏小但文戲都有水準以上，而且F4已重拍多次，選擇同《超人》一樣刪去變英雄嘅起源安排得唔錯，但有《超人》在前亦未見有特別。反而音樂變得更特別同真係融入到劇情，再唔係以往嘅罐頭音樂，終於有進步，心感安慰。憑音樂都加到分比佢。

對於F4未有太大的感情，當佢係新既一個Marvel世界開始，希望將來可以連繫返大古仔。以新故事黎講就普普通通，唔太緊張，可以有進步。個人覺得佢首歌都幾煩😂