紅豆

真係有少少脆友講嘅鏗鏘集Feel，港式小品到極致，幾乎完全聚焦於父親同女兒嘅關係上面。剪接雖然有張叔平掛名，但我就好懷疑佢親自落手有幾多？全劇嘅剪接係零碎同唔算流暢，而且故事內容都幾跳躍，例如上一幕講男角溝女，下一幕就講佢地拍左好耐拖了。基本上全劇大部劇情都係咁樣極速發展，中間橋段skip哂，只留重點。導演自己都話係用歐洲短片式剪接，我就麻麻地識欣賞。話雖如此，但導演想講嘅野都有藉住「紅豆沙」呢個主旨講哂，包括咩為家人放棄夢想呀、移民問題呀、老豆重男輕女但其實內心愛佢個女，只係大男人唔識表達，呢啲命題其實導演都好淺白咁講哂，去蕪存菁亦係電影只有80幾分鐘嘅原因。另外幾欣賞電影嘅音效，我聽音樂就垃圾耳，但感覺呢套戲嘅音樂好特別，由其某幾幕重點場面嘅音樂非常有感；同埋幾場嘅女角兒時回憶橋段雖然都插得好突兀，但用紅色呢個色調響應返「紅豆」其實幾深刻。但除此之外，成套戲其實無乜記憶點留得住，任達華鄧麗欣嘅演出睇落都係一貫「普通」電影水準，無話特別落力去演。

其實演員好好，故事個底都好好，但各樣細節都可以再細膩，好似煮紅豆沙咁，要篩過先食到啲沙

個人覺得這套戲尚可 ，我會講，套戲好比一煲有誠意但火候和餘韻不足的紅豆沙。我會形容導演雖有潛質，但在執行和安排上仍未成熟，很多地方的處理未如理想，令套戲進退失據，尤其是這條感情線，個人覺得這樣是套戲一大累贅，如果可以將他省略，將描寫父女矛盾或小區情懷的部分加重，其效果同感覺會更好。咁當然他在描寫潮州男人因倔強個性及重男輕女文化所衍生的矛盾著墨頗深，卻令套戲不致於完全失敗。痴·影·夢·藝 X 的專頁 https://www.facebook.com/ckwunmovie/

故事提材本身已經冇乜特別，都係一啲香港好平常會發生嘅事情，劇情喺其他唔同嘅港產片都有出現過。但唔重要，只要編、導、演各方面處理得好，仍然可以拍出扣人心弦嘅電影。不過此作品未能做能以上所講。電影故事本身過於平凡直白，家庭事表達亦平淡，牽動唔到觀眾情緒起伏。一家人角色設計、演譯同互動亦表現唔到一家人從心發出嘅情意。部分角色演出生硬亦令電影入戲度下降。整體只係一套流於表面、未能入心嘅故事。

“最重要的不是地點，而是人。”以港式老字號為背景，其實就是一個家庭的故事，故事平淡但節奏良好唔悶，處處充滿人情味，故事結尾更是意想不到。4.5/5 （90分）

導演眼高手低，想慢慢滲出淡淡嘅哀愁，勾起觀眾對老港味道嘅懷戀，我睇嘅係老人早場，佢哋照例竊竊私語，完場時燈光一亮，「吓，完喇，咁快嘅！」所以如果電影🎬有實現初衷嘅話，佢哋應該係呆坐一回，陷入深深嘅回味之中，然後輕輕歎息，拍拍屁股緩緩離坐，而不是急著去廁所🚾其實電影播映途中，佢哋更不斷高聲打呵欠🥱老而無品，亦反映電影未能引起共鳴！紅豆沙貴乎香甜，紅豆香陳皮甘甜，可惜任達華代表陳皮，鄧麗欣代表紅豆🫘，一個只係青皮不是紅皮，相關故事只有苦味欠缺甜味，另一個雖灑洗過又篩選過，但冇炒過，所以唔夠香，兩人起不到又香又甜嘅化學作用，滲唔出應有嘅情味，落得一碗淡而無味嘅紅豆沙，令觀眾和食客帶著遺憾離開⋯⋯我唔係話華哥Stephy「兩父女」演技比唔上《破地獄》許衞「兩父女」，同樣出於父愛，唔想女兒走自己年輕時別無選擇嘅艱苦道路，但哩齣就係冇嗰種感人肺腑嘅化學作用！電影編導唔知係唔係想走日系路線，又慢又淡又街坊又人情味，可惜有形無神，徒具形式，流於表面！魏浚笙角色設定最唔討好，冇乜表現機會，為人前後矛盾，都唔知做乜！最討好係龔慈恩，俾老夫拖手過馬路、飲糖水嘅幸福人妻感覺溢於言表，內心戲勝過千言萬語！承業為咗傳承張興記居然放棄相愛嘅魚腸，最令人莫名其妙😲老父冇要求佢繼承、連自己都唔知點解要「承業」，勉強搬鋪留喺舊區照顧老街坊等下次舊區重建被強拍，有乜意思？與其被新香港迫遷/淘汰，何不相愛相擁在他方，仲可以將紅豆沙發揚光大、惠澤八方、開枝散葉！所以哩套戲居然「政治正確」，叫後生仔留低喺「遺址化」嘅香港「承業」，咁配合政府「說好香港故事」嘅政策，攪到我都同啲廢老喺散場時一齊伸懶腰🙆‍♂️大聲打呵欠🥱又冇說服力又唔感動仲要爛尾😱😱😱