家不成家——我生於巴勒斯坦(bcDocs)

電影最令人感動嘅係巴勒斯坦法律畢業生Basel和以色列記者Yuval，自2019-23年嘅無間合作，兄弟手足之情洋溢到奧斯卡頒獎禮上，證明以巴可以合作及和平共存。片中可見猶太人已經唔再係值得同情嘅被迫害者，反而成了加害者，不斷用骯髒手段驅逐巴勒斯坦人離開故土：不批建屋（於是所有巴人房屋俱為僭建）、藉口建立軍事禁區強拆巴人房屋甚至學校、製造假新聞反控巴人入侵軍事禁區、任意拘捕及開槍殺傷手無寸鐵嘅和平示威者、擴建猶太殖民區（巴人被迫穴居😱😱😱）、軍隊糾結武裝殖民者破壞巴人基建⋯⋯片末還補上一段哈馬斯2023年大規模恐襲並擄走人質後，武裝殖民者嘅報復性暴行。一個民族要被迫害到乜嘢程度，至會無時無刻都擔心種族會被清洗及家鄉故土會守唔住，以致幾窮都好，以前每家都有部手提攝錄機，而家每人都有部智能手機？危險時錄下暴行公諸於世，和平時記下家人尚齊整時嘅基本樂趣，但都是真真正正地在擦存在感！不過哩啲視象紀錄日積月累成為巴人被虐嘅如山鐵證和這部得獎紀錄片。侵侵話巴人唔肯放棄土地係因為唔知有得揀（可以離開到別國生活），企圖做以色列幫兇驅逐巴人，強佔迦沙發展成旅遊區，並迫鄰國約旦🇯🇴埃及🇪🇬接走巴人，真係臀部當腦部，片中巴人寧願穴居露宿日夜重建都唔肯放棄祖地，美國如果真係興建旅遊區，我擔心不但血本無歸，遊樂場🎡變殺戮戰場都似！完場時有外國觀眾三次高呼Free Palestine，我都忍唔住嗌埋一份並熱烈鼓掌👏