破．地獄

4.999⭐基本上近乎冇嘢我要去挑剔，電影睇得我熱淚盈眶。🥺本作品編、導、演及各技術部門表現俱佳。1. 電影題材特別，港片從來未有觸及過，有新鮮感。睇完可以長知識。2. 劇本出色紮實，言之有物，對白精彩，冇多餘嘅枝節，意義深層。全片亦充滿對立位 ：黃子華新舊職業、新思維去經營傳統舊行業、生與死、父女/父子對立面、死人同活人嘅地獄 ..等等，但最後各種對立/茅盾都得到撫平，令人感動之餘，亦有治愈、釋懷感覺...好正！而故事中每一個角色都描寫深刻細膩，心路歷程嘅轉變都好流暢，冇寫太多亦冇寫太少，恰到好處。睇得出導演/編劇花咗好多心思去彫啄劇本故事同每一個細節。3. 選角恰當，演員出色。許冠文外型絕對似一個守舊又固執嘅喃嘸佬/老豆，著起道士衫入型入格。黃子華外型似足現代香港醒目仔，口齒玲琍，口甜舌滑。兩個角色外型同性格亦係一個充滿電影對立位嘅組合，自然產生不少電影火花。加上兩人演技同個人魅力，自然交出好精彩嘅戲。要比較兩人的話，我會揀許冠文，因為其角色較黃子華角色更令人暖心同憐愛，試問一個外冷內熱又可愛嘅父親結局又怎能不令人動容。而許冠文演譯角色亦非常到位。至於黃子華表現則保持水準，但角色設計比較平面同幾“黄子華"下，冇許冠文角色設定咁大感染力。事實上兩位都已超水準演出。其他角色朱康、衛詩雅、梁雍婷、...等等都係我睇佢哋咁耐表現最好嘅一次，特別係衛詩雅，超水準演出。另外，連出鏡唔多嘅秦沛都好好睇，尤其最後出席悼念裝香果下，表情已交足哂戲。本片淨睇演員都好滿足。4. 各技術部門出色：攝影、剪接、燈光、美術、收音...等等佳出色，睇得好舒服。總括本片非常出色，感動人心，令人反思，亦有治愈感覺，估計香港電影金像獎會攞唔少，絕對要入場欣賞，亦有二、三刷嘅價值。我講到套戲咁好，點解要扣佢0.001分？就係衛詩雅句粗口。唔係話我接受唔到粗口，只不過成套戲對白咁乾淨，連白只咁火爆又惡爺嘅人設都冇講粗口，而衛詩雅戲中一直亦冇講粗口，一講就有啲突兀感覺，唔覺得劇情有講呢個 L 字嘅需要，冇就更好。而且講時又刻意拗字清晰，結果講得唔多流暢同生硬，為講而講咁，我當時真係打咗個突出咗戲，佢講得自然流暢啲有輕重音有返些少氣勢/節奏我可能未必會出戲。😅不過此乃小沙粒，並冇影響我對電影嘅整體觀感。此片係值得各位睇完後推薦身邊朋友入場嘅佳作。亦期望此作能破毒舌紀錄成為香港電影票房No. 1。我亦有推薦我嘅屋企人、朋友入場。PS. • 真係要比番個special thanks演出“大體”果幾位演員，勇氣可嘉！• 其實我相信呢幾年絕大部分香港人都係活在多過一個地獄裡面，希望嚟緊都能一一破除，重回昔日快樂時光。• 現實生活我亦睇過破地獄，道士起勁地打圈圈武劍，但電影中又見唔到。

上映8日已經達到5500萬票房，破多項香港影史紀錄，包括單日票房超過900萬，單日放映場次超過800場，有戲院一日五輪六個院只播這套戲，場次密過唔少巴士班次！相信很快會打破子華神套毒舌大狀去年所創造的票房紀錄。.電影叫好叫座，除了有一班好演員參演，還有一個好劇本。雖然題材是華人忌諱的生離死別，但這正是最貼地最貼身的議題，每個人都會經歷身邊人生死。透過告別式帶出愛要及時，劇情發展不難預料，但對白精境，含金量高，絕對是笑中有淚，悲中有喜。.許冠文，衛詩雅及朱栢康條主線帶出原生家庭重男輕女的傳統思想，加上喃嘸業傳男不傳女，不時提到女人污糟，祖師爺不喜歡，更突顯狀況。呢條線每個角色都寫得好立體，好人性化，看到最後我兩行眼淚一直流，除了被電影觸動，也聯想到自身家庭，那對傳統思想，不善表達的年邁父母。.至於黃子華由唯利是圖變到最有心的禮儀師，將傳統殯儀業帶來新視野，當中的衝擊並非一面倒的對與錯，透過幾條支線帶出取得平衡才是在現今世代能夠持續發展的態度。其中兩個真係寫得好到肉，韋羅莎的想法未必每個人能接受，但這超渡先人也要超渡生人想法。梁雍婷條線點到即止，簡而精地帶出動之以情。.演員的演技不容置疑，當中電影的美術指導也是神來之筆，戲中的「死屍」很有真實感，而破地獄的場面也拍得很唯美。加上林家謙的片尾歌曲，也讓觀眾釋懷離場，繼續破地獄。.觀影平台: 嘉禾黃埔.IG: AndyMyFilmography/ #AndyMovieReview

套戲個鋪排需要一讚👍🏻…初頭睇落感覺無乜嘢，好平鋪直敘嘅故事，但一幕又一幕，一個接一個小插曲故仔，全部都絲絲入扣，目的就係刻劃出子華嘅性格特質，與及對殯儀業嘅另一種堅持！劇本難得寫得幾好，好有意思，亦都有所共鳴；好多演員都需要讚，演得非常之好，睇到好沉重，聽到在場唔少觀眾都聲淚俱下；亦未試過即使唔係謝票場，最尾字幕過後散場開燈係聽到一陣掌聲👏🏻…實在難得一套好電影！

每位出色的喜劇演員，都有一套只屬於自己的「節奏」。別人硬要模仿，要麼是形似神不似，要麼是神似形不似。毫釐之失，味道就完全不一樣了。這套混和說話速度、表情變化、肢體語言組合而成的節奏，烙印着強烈的個人風格。與此同時，僵固的模式，往往成為自我突破的累贅與負擔。許冠文和黃子華，大半輩子靠喜劇行當，佔據香港一線諧星地位，個人風格明顯。許冠文在八年前的《一路順風》，放棄過往誇張的套路，嘗試用平實的方式，演繹一個為口奔馳的台灣的士司機。也許是受到用國語說對白的影響，也許是因為這是他演戲生涯中為數不多的劇情片的關係，「米高哥」的臉上，還是殘存了喜劇演員的痕跡。沒有看過去年的劇情片《風再起時》，只能估計金像獎的一眾評委，票選許冠文成為最佳男配角得主，並非出於敬老之心。經過兩片「熱身」，耄耋之年的許冠文在《破·地獄》中，成功卸下臉上最後一筆諧星妝容。過去兩年，黃子華憑着《飯戲攻心》和《毒舌大狀》，一舉摘掉「票房毒藥」的帽子。前者是溫情輕鬆喜劇，「大哥」對黃子華的考驗不大，能夠衝破七千萬大關，是結合了天時地利人和。至於《毒舌大狀》林涼水一角，說是度身訂造也不為過。幾場法庭上的唇槍舌劍，黃子華的表現雖稍遜謝君豪一籌，但起碼已抹去《棟篤狀王》宋世傑的樣板。真正考牌，是球場看台上一番「原來我最契弟」的獨白，黃子華太用力，太七情上面了。直到今次扮演魏道生，「子華神」終於脫掉一層皮。香港殯儀行業，一文一武，文是行街，武是喃嘸。《破·地獄》中的文與武，一個外行，一個內行，這樣的設定，很容易帶出戲劇衝突。然而電影初段，魏道生隨意將舊傢俬送去堆填，以及沒有了解清楚死者家屬的忌諱，此等莽撞行為，完全不似五十開外，曾經摸爬滾打多年的老江湖。為衝突而衝突，那幾場戲，陳茂賢導演想得不夠仔細。落筆打三更，往後的主線，反而及不上幾條副線感人。朱栢康和衛詩雅的好，不同媒體早已讚譽有加，在此就不再錦上添花。倒是秦沛、金燕玲、韋羅莎、梁雍婷幾位不同年齡層的演員，隱而不顯，含而不露，頂級綠葉。歷年感想，存檔IG及FB：pm7290movie（https://www.facebook.com/Pm7290movie-105185654399988/）歡迎瀏覽。

真心好睇，每個劇情發展都寫得好好同好連貫帶出最尾既訊息比觀眾！每個人每日倒數，但唔係每個人都破到地獄，活人超渡成功，可能只係差一句話，但通常都會成為遺憾。。。今日睇黃子華，好煥然一新！衛詩雅同朱柏康兩個都演出非常非常好！好貼地！許冠文既南音，好有特色！